Skule, kultur eller kulturinstitusjon?

Fredag arrangerte Norsk kulturskoleråd ein konferanse for leiarane sine. Her diskuterte dei framtida, etter at Engerutvalet har trekt kulturskulen fram som ein av taparane etter Kulturløftet 1 og 2.

Dette trass i at kulturskulen var høgt på lista då Kulturløftet 2 vart presentert. Regjeringa lova kulturskuletilbod til alle som ynskjer det, men dette ynsket er ikkje oppfylt i 2014.

I det neste løftet er det signalisert at grunnmuren — det lokale og frivillige kulturlivet — bør bli prioritert. For kulturskolen er så det store spørsmålet: Korleis?

[link id=67038 title=»Les også: Valgflesk eller velvilje?«]

Flytta ansvar?
Engerutvalet har i sin rapport komme med to anbefalingar. Det første å øyremerka midlar til kulturskulen, det andre å flytta ansvaret for kulturskulene frå kunnskaps- til kulturdepartementet.

På konferansen vart desse ideane ikkje berre møtt velvilje. Der synet på øyremerking er delt, var dei fleste innleiarane usamde i tanken om å gje kulturdepartementet større ansvar.

Også kunnskapsminister Kristin Halvorsen uttrykte klar motstand mot dette då ho vitja konferansen på slutten av dagen.

— Eg trur ein omgjer kulturskulane til kulturfritidstilbod dersom ein tek dei ut av kunnskapsdepartementet. Kulturskulen er uansett naturleg knytt til kulturverksemder kring i landet. Spennet mellom kultur og læring er viktig å halda fast på, understreka Halvorsen.

— Treng faglege krav!
Rektor ved Noregs musikkhøgskole, Eirik Birkeland, hadde tidlegare på dagen ytra sin skepsis.

— Eg fryktar at ei slik flytting vil føra til at kunst- og kulturfaga blir mindre viktige. Det er litt som å flytta kulturen frå P1 til P2 —eller til og med Alltid klassisk, sa han.

Birkeland meiner at eitt av ankepunkta til kulturskulen — ut over at politikarane ikkje klarer å få pengane til å finna vegen fram — er at ein fokuserer for mykje på ventelister og for lite på det faglege innhaldet.

— Det er sagt på konferansen at kulturskulens verdikjede handlar om å læra, skapa, formidla og oppleva. Slik eg ser det, er læringa det svakaste leddet. Det er problematisk at ein ikkje har sett faglege standardkrav for utdanninga, slik ein har elles i skulen. Det vonar eg vil endra seg når ein no skal i gang å skriva ny rammeplan, sa han.

— Alltid i skvis
Aksel Hagen i SV fortalte at han ikkje tykkjer at plasseringa spelar noka avgjerande rolle. Det viktige er at ein tvingar departementa til samarbeid, hevda han.

— Det går to parallelle skuledebattar i Stortinget. Dei dominerande stemmene meiner ein skal tenkja meir kunnskapsinstrumentelt enn før. Samstundes seier den nye stortingsmeldinga at dei estetiske faga skal få auka vekt. I konkurransen med barnehage og grunnskule hamnar ein nok uansett i skvis i kampen om ressursar, sa han, og understreka at han trur at ein også i kulturdepartementet vil sjå at andre område vert prioritert først.

— Så langt er kunnskapsdepartementet det av departementa som har innfridd, med innføringa av kulturskoletimen, sa Hagen.

Følg musikkdebatten: Ballade på Facebook
Følg Ballade på Twitter

Viktig kulturskuletime?
Etter responsen å dømma, var kulturleiarane openbart enige i at kunnskapsdepartementet er ein god plass for kulturskulen å vera.

Men det var fleire innvendingar mot kunnskapsdepartementets tiltak, [link id=67958 title=»kulturskuletimen»], som skal sikra alle elevar på 1.-4. trinn får ein times kulturskuletilbod i skuletida/på SFO. Fleire kulturskuleleiarar ynskjer at dei 177 millionar kronene ville ha komme betre til nytte om det faktisk vart fordelt til kulturskulene i landet.

Førstelektor ved musikkhøgskulen, Signe Kalsnes, meiner imidlertid at kulturskuletimen er viktig.

— Eg trur kulturskuletimen er vesentleg som eit tilbod til det store mangfaldet av unge. I kulturskuletimen er det ikkje snakk om å måtta oppsøka nokon perifer plass som heiter kulturskulen. Undervisninga skjer på skulens arena, og terskelen er låg for å bli kjend med kulturskulen, sa ho.

Opposisjonen ved Øyvind Håbrekke (Krf) uttalte seg ikkje om departement, men talte varmt for øyremerking av midla til kulturskulen.
Hør Halvorsens innlegg på Youtube.