HEILT KONGE: Solveig Brekke Hauknes og Ole Nilssen vann kongepokal. Her med sangfinalist Synnøve Brøndbo Plassen (t.h.) som tralla til dansen deira.(Foto: Thor Hauknes)
Kongepokal til polsdansarane Solveig og Ole
Her er resultata frå landskappleiken på Hovden.
Hovden i Setesdal: Landskappleiken 2026 er over, etter fleire dagar fylt med musikk, dans, song, møte mellom generasjonar og høgt nivå på utøvarane. Det skriv FolkOrg – organisasjon for folkemusikk og folkedans.
Dei skriv i ei pressemelding at Hovden har vore fylt av fleire tusen folkemusikkentusiastar frå heile landet, og ei stemning som vil bli hugsa lenge.
Deltakarar har vist fram den store breidda i norsk folkemusikk og folkedans. Frå dei aller yngste som har hatt sine første opptredenar under Superkappleiken, til mange av landets fremste utøvarar som har kjempa om dei mest prestisjetunge titlane, har nivået vore svært høgt også i år.
– Vi sit att med ei enorm glede og takksemd. Det har vore ei veke prega av kvalitet, speleglede, danselyst og fellesskap. Hovden har vist seg frå si aller beste side, og vi er stolte over både deltakarane, publikum og alle dei frivillige som har gjort dette mogleg, seier leiar av hovudnemnda Knut Erik Jordstøyl.
– Eg vil rette ei stor takk til den lokale arrangøren og alle dei frivillige som har gjort ein formidabel innsats. Å vere førstegongsarrangør av Landskappleiken er ei stor oppgåve, men Hovden og Setesdal har gjennomført arrangementet på ein framifrå måte. Dei flotte omgjevnadene, den gode stemninga og eit arrangementsområde med god plass til både deltakarar og publikum har gjort dette til ei svært god oppleving. Dette kan arranglaget Setesdal spelemannslag vere verkeleg stolt av, seier Kristian Ihle Hanto, styreleiar i FolkOrg.
Finalen om kven som skulle vinne årets Kongepokal er eit hødepunkt. Det er rullering kvart år på kva klasse innan A-klassene og seniorklassene for solistar innan spel og vokal og for danseklassane halling og par-dans. I år var turen komen til klassa for Dans fele A.
Dei tre beste dansepara i klassa kom til finalen som var laurdag kveld. Dommarane bestemte seg for at
Kongepokalvinnarar for 2026 er Solveig Brekke Hauknes og Ole Nilssen. Dei representerte #Hedmark med Pols frå Østerdalen.
Dei to andre finalepara var Tone Ingvaldsen og Snorre Kristiansen, som representerte FolkOrg og Bulder og Brak med ein Nordlandspols – Anne Nilssen Grytting og Stig Nilssen, som representerte Hedmark med Pols frå Østerdalen.
– Også finalen i Vokal A baud på sterke musikalske opplevingar, skriv FolkOrg.
– Dei tre sangfinalistane hadde kvar sin minikonsert der dei fortalte om kva dei skulle framføre og trollbandt publikum med nydelege tonar.
Vinnar av Vokal A for 2026 er Silje Risdal Liahagen.
Finalistar var Synnøve Brøndbo Plassen, som representerte Hedmark folkemusikklag – ho tralla altså også i dansefinalen, til Solveig og Ole– og Lars Fivelstad Smaaberg frå Gol spel- og dansarlag.
Ledige stillinger
Siste finale ut i år var klassa Halling A. – Det er alltid stor stemning i salen under halling-klassane, og slik vart det og når dei aller beste i går synte fram danseglede, teknikk, musikalitet og ikkje minst spektakulære gokar´ stykkjer for ein heilt full hall. Vinnar av Halling A for 2026 er Ådne Geicke Kolbjørnshus.
STAS: For sitt mangeårige og omfattande arbeid for norsk folkemusikk og folkedans er Hallgrim Berg utnemnd til heidersmedlem i FolkOrg.
Olav Sæta har gjennom meir enn femti år lagt ned omfattande arbeid med innsamling, dokumentasjon og formidling av norsk folkemusikk, og vert tildelt samme heider. (Foto: Thor Hauknes)
Meir om finalistane i Halling A – og dommarar i tevlingane – på folkorg.no.
– Med dette går endå ei vellukka utgåve av Landskappleiken inn i historiebøkene. Arrangørlaget Setesdal Spelemannslag og FolkOrg vil rette ein stor takk til alle deltakarar, dommarar, frivillige, samarbeidspartnarar, sponsorar og publikum som har bidrege til å gjere Landskappleiken 2026 til ei uforgløymeleg oppleving, heiter det i meldinga.
Spelemann Hallgrim Berg og musikkvitar Olav Sæta vart utnemnde til heidersmedlemmar i FolkOrg.
