AGNES OG DAGNE OG ELLEN: Songliner heiter programposten der folkesongarar møtast. Ingvill Marit Buen Garnås og Odd Nordstoga speler. Og syng.
Ny konsertserie på Telemarkfestivalen: Kjende norske songarar feirar andre norske songarar, som også var mødrene deira.
Dei kjende musikarane og songarane Øyonn Groven Myhren, Aasmund Nordstoga, Odd Nordstoga og Ingvill Marit Buen Garnås hyller eigne mødrer – og songen – i Telemark i august.
Laurdag 8. august møtest dei i Bø til ei særskild konsertoppleving – og eit felles minneprogram for mødrene deira, som alle gjekk bort i 2024. Songliner er ein ny programpost mynta på møte mellom folkesongarar og tradisjonar. Namnet peikar mot korleis songen kan vandre i liner mellom generasjonar, familiar, folk, land og kulturar – og korleis musikken bind menneske saman over tid og stad.
– Årets konsert markerer starten på eit langsiktig arbeid, der Songliner skal utviklast vidare. På sikt vil konseptet òg romme møte mellom folkesongarar frå ulike tradisjonar og land, skriv festivalsjef Kristoffer Mosfjeld til redaksjonen.
– I den første Songliner-konserten møtest fire utøvarar med sterke røter i den vokale folkemusikken i Telemark. Konserten blir samstundes eit felles minneprogram for mødrene deira: Agnes Buen Garnås, Dagne Groven Myhren og Ellen Bojer Nordstoga – som alle vandra hen i 2024. Kvar av dei hadde eit sterkt engasjement for å halde kvedartradisjonen levande og føre han vidare til nye generasjonar. Nettopp denne arven og det musikalske påskuvet heimanfrå gjer møtet mellom desse fire særleg meiningsfullt, skriv festivalen.
Telemarkfestivalen 2026 finn stad mellom 6. og 9. august med lokale, nasjonale og internasjonale artistar på forskjellige stader i Midt-Telemark. Festivalen siterer ein kjend spelemann i sin epost:
– «Å ta vare på er å ta i bruk», som Knut Buen pleier å seie. På Telemarkfestivalen lovar me eit alltid like spennande møte mellom då og no; mellom fortid og framtid, fordi me trur at tradisjonen skal både nyttast og brukast.
