"Operaen 'Asle og Alida' er et storverk og et vesentlig verk i vår tid. Det var jeg overbevist om da jeg satt i salen i Det Kongelige Teater, mens framføringen beveget meg, fylte og løftet meg. Jeg mente det like sterkt da jeg langsomt forlot bygningen etterpå og steg ut mellom Københavns kanaler, og jeg mener det fortsatt like sterkt nå. Dette verket har skrevet seg uutryddelig inn i vår tids operavirkelighet i Norden, Europa og Vesten. Måtte det bli oppført ofte framover." - Kritikar Erling E. Guldbrandsen i Ballade(Foto: Monika Kolstad)
"Årets Reumert" omtalast som Danmarks største og mest prestisjetunge scenekunstpris. Bergen Nasjonale Opera og Det Kongelige Teater i København er nominert for operaen "Asle og Alida" med tekst av Jon Fosse og musikk av Bent Sørensen.
– Asle og Alida er et storverk, et vesentlig verk og et mesterverk, skreiv kritikar Erling E. Guldbrandsen i Ballade etter å ha opplevd operaen i København i mai 2025.
– Ein skremmande vakker opera, med alle kjenneteikna til ein moderne klassikar, skreiv danske Berlingske, som gav fem av fem stjerner.
No er operaen nominert til den anerkjente Årets Reumert-prisen i klassen «Årets opera». Prisen vert delt ut årleg for å heidra framifrå prestasjonar innan teater, dans, musikal og opera.
«Asle og Alida» hadde urpremiere i Bergen i mars 2025 og vart sidan spela i København. Teksten til Jon Fosse og musikken til Bent Sørensen vekte internasjonal begeistring, og det same gjorde prestasjonane til songarane i tittelrollane, med danske Louise McClelland Jacobsen og svenske Wiktor Sundqvist i spissen. Norske Christina Jønsi blei også framheva saman med dei andre songarane.
BNOs operasjef Eivind Gullberg Jensen dirigerte framsyningane både heime i Bergen og ved Det Kongelige Teater i København. Det var òg Gullberg Jensen som bestilte verket av Jon Fosse og Bent Sørensen i si tid, fortel BNO.
– Det var eit stort privilegium å få setja saman to av dei fremste kunstnarane i Norden, Jon Fosse og Bent Sørensen, i arbeidet med å skapa operaen Asle og Alida – og ei glede å oppleva korleis karakterane i Fosse-trilogien fyrst fekk språk, deretter røyst og tone. Me er veldig glade over mottakinga av dette meisterverket, både i Bergen og København. Asle og Alida slo publikumsrekord for eit Jon Fosse-stykke på Vestlandet, i tillegg til at nasjonal og internasjonal presse samrøystes hylla operaen. Denne nominasjonen er ei gledeleg forlenging av den responsen, seier operasjef Eivind Gullberg Jensen.
Årets Reumert 2026 vert delt ut sundag 7. juni på Folketeateret i København, og Bergen Nasjonale Opera vil vera til stades under utdelinga.
Nominerte til årets opera:
- Ragnarok, Det Ny Opera
- Written on Skin, Det Kongelige Teater i samarbeid med Festival d’Aix-en-Provence, Den hollandske nationalopera, Opéra National Capitole Toulouse, Royal Opera House Covent Garden London.
- Asle og Alida, Det Kongelige Teater og Bergen Nasjonale Opera
