Korensemblet Volve Vokal feirar sine 15 år ved å lansere si første joleplate, «Deilig er den himmel blå». Dette blir markert med to høgtidelege adventskonsertar i Universitetsaulaen i Bergen.
Plata er dedisert stykket med same namn, arrangert til Volve Vokal av den bergensbaserte komponisten, Irene Adolfsen Wenæs. Igjen har koret gleda av å urframføre eit stykke arrangert av denne dyktige komponisten.
Koret har skapt ein eigen tradisjon ved å utfordre sjangeren «jolekonsert». Leik med det tradisjonelle repertoaret og eksperiment med det sceniske uttrykket, blir sydd i hop til ei heilskapeleg konsertoppleving. Korets kunstnarlege leiing; dirigentar, Thea Meidell Sjule, Gro Espedal og regissør Hild Vang gjer inkje unntak ved dette høvet.
